(لأمى.. الصبح الذى ما زال يشرق فى وجدانى)
(1)
ياه ,,, يا أمى
مستحيل أنساك وانت
جوا ذاتى
(2)
حاسس بانى مش هنا
عايش هناك
الأرض ماسكة ف ديل ثيابى
والروح بتسرح كالملاك
مخنوق ف جسم من التراب
مع انى طير سابح ف كون
بالرفرفة
بالزقزقة
عايش بتسبيحة رؤاك
( 3 )
أم عيدها كل وقتى
كل يوم
ليها عمرى لو ملكته
وادعو ربى يكون رحيم
هيه صاحية فينا عايشة
لو مكانها ف السما
وسط النجوم
(4)
قال لى ربى :
حب أمك أصل حبى
يا الله لبى
بعده حبك للوجود
(5)
فتشوا القلب وقولوا
واصدقونى
هيه أمى ساكنة فيه
ولا غابت
(6)
سدوا بركان الشجن
قلبى يا امه قيدوه
من غير سكن
باطحنوه
ويغربوه
بعد منك
متلقاش غير الكفن
(7)
قلبى بابكى ..
بعدها مالاقيتش صاحب
ليه يا أمى
غبت عنى
اترميت برا الحواجب
(8)
امى كانت غنوة حلوة
لقلب باعشق للطرب
امى كانت كاس محبة
يعشقه كل النجُب
أمى شمس الروح ,,, قمرنا
لو تغيب
ضاع أملنا واحتجب
(9)
شيلتها بس ف مماتها
كنت عايز حال حياتها
أشيلها فوق قلبى
وأقوتها
وارتمى ما بين اديها
وابوس تراب عدت عليه
هيه ليه
سابتنى قبل ما اكون لها
شوية تراب
تمشى فوق روحى وتنعم
انى ليها كنت مطرة
والسحاب
خرجتنى للحياة
ودخلتنى حياتها تانى
لو باعانى تكون لى حضن وصيدلية
والشفا
وبر النجاة
شيلتها وشالت وجودى
بعدها ما ليش حياة
(10)
كل ما ابص ف عنيها
ارتوى من نور جمالها
لهفة حلوة وعشق خالد
ربنا يرحم سؤالها
(11)
كنت ليها زهرة فايحة
تشمنى برموش عنيها
تنتظرنى لما اغيب
قلبها مخطوف عليَّة
يشتكى منى اليها
ولما بارجع تبتسم لى
مع قسوتى ما تشلش منى
وتحكى عنى ف كل جيهة
(12)
أمى ساكنة ف العلالى عند ربى
ف الجنان
وانا ساكن جوا منها
ف النعيم
(13)
الحروف شايلة المعانى
الا حرف ف معنى أمى
عجزه كامل مهما يعنى
أو يحاول جهد عزمه
أن يبعبع
أو يكنى
(14)
طاعتى ليكى يا امة دايمة
ف اخواتى البنات
عمرى ما اتأخرت عنهم
ف فرحة كانت
أو زنقة بتحدِّف شكاية
أو شتات
ود خالص
مش مصنَّع
زى ودك لما كنتى
بتدِّى ليهم فرح متحنى
وهبات
(15)
قد ايه الأم لمِّة
بعدها بنكون شتات
الحقيقة الرب باجمع
شملنا ف الأمهات
(16)
البيبان تقدر تغير
الا أمك باب وجودك
(17)
اى حب وله مجاله
حب أمك قبل زوجتك
حب زوجتك له مجاله
اوزن الأمر بنهايته
واللى غايته ترضى ربك
اعرف انه
أصل ما تغيرش حاله
الشاعر وحيد راغب
ليست هناك تعليقات:
إرسال تعليق