الحسبة غلط
__________
كان الواد من فرحته
بالحب متغندر
يمشي تشوف ماشيته
تقول عليه عنتر
عاوج كده قوسته
والفرق متسنتر
وأهم ما في دنيته
الشكل و المظهر
أنا شوفته يوم دخلته
سبحانه من صور
حتى رباط جزمته
لون الحزام اخضر
عشر سنين مروا
أنا شوفته معرفتوش
مش هي دي هيئته
ولا شعره دا المنكوش
وتكشيره في خلقته
ما يفكها إلا شاكوش
عيل ماسك ركبته
والتاني على دراعه
سألته عن دنيته
فجرلي أوجاعه
حسباتي كانت غلط
وأحلامي كمان ضاعوا
وسألته أيه السبب
شاورلي بصباعه
على ست في البلكونه
بهيئة كبير الغول
وقالي الهانم مراتي
أنا قولت مش معقول
ولقيتها بتبرق له
وبتزعق فيه وتقول
بتنيل أيه عندك
أطلع يا شملول
وبصلي وقالي
وسامعه وأنا مذهول
أياك تبيع حريتك
لواحده ما تستاهل
او تمشي ورا قلبك
وفي العقل تتساهل
تلاقي نفسك بقيت
في حديد ومتقيد
ومهما حاولت الهروب
الحل مش ساهل
أحلم يا سيدي إنما
حب على قدك
أحلم بنجم السما
نازل يبوس خدك
أحلم بقمر اللليل
طالب ينول ودك
لكن إن في يوم حبيت
حب اللي حيصونك
تمالي يبقى معاك
ولا مرة يكون ندك
عمر الجمال ما كان
في صورة بتشدك
دي الروح لو كانت جميلة
بالود حتمدك
تسعد حياتك معاها
ولا ترضى يوم بعدك
وسلم علياَ وسابني
الدمع في عنياَ
والست صوتها عِلِي
في عربية معدية
( أعطني حريتي أطلق يديا
إنني أعطيت ما أستبقيت شيئا )
ليست هناك تعليقات:
إرسال تعليق